الرئيس عبد الفتاح السيسي أثناء جولته التفقدية على المحاور والطرق الجديدة. الصورة: المتحدث باسم الرئاسة

نص كلمة السيسي أثناء جولة تفقدية لأعمال تطوير الطرق والمحاور بالقاهرة 19/3/2021


طيب، إنتوا الكوبري ده، الكيلو 600، سايبين تحته محور لمدينة الأمل عشان يتحركوا عليه، مش كدة؟

طيب، أنا بس بتكلم على مدينة الأمل تحديدًا، وامتداد شينزو آبي اللي هو، يبقى إنت عملت كدة محورين جوة.. طيب، كنت أنا قلت إن إنتم مع الناس اللي موجودين في مدينة الأمل، ومع المحافظة، نشوف إزاي نوسع، أو نخلق محورين تلاتة كمان جوة، جوة المدينة، عشان نوسع على الناس، نخليها..

طيب، محور الميثاق ده، كباريه خلصت كلها ولا؟ يعني إذن المحور كله من أول الفردوس، مش كدة، من أول الفردوس لغاية الدائري.

الفردوس جاي من البعوث الإسلامية.. طيب فاضله قد إيه؟ يعني لسه شوية.. لسه شوية.. كنت أتمنى قبل رمضان نكون مخلصين.. طيب والكوبري الـ1600 ده؟

إحنا عايزين نقول للناس إحنا بنعمل إيه.. مش كدة؟ طيب.. أنا بقول لكل شرق القاهرة، كل سكان شرق القاهرة، والناس المتحركة من وسط القاهرة لغاية شرق القاهرة، رايحة التجمع، رايحة السويس، رايحة الإسماعيلية.. إحنا خلقنا محاور، طسّينا تماما حجم الكثافة بتاعة العربيات في عدة نقاط.

إنت النهاردة هنا بتتكلم على محور، خلاص بقى، ده الدايري مش كدة؟ خلاص ده ماشي زي الفل، وبنوسعه، وبعدين جينا النهاردة بنتكلم على محاور بقى تدخلنا عليه بشكل مستريح أكتر من الأول. زي الميثاق على سبيل المثال، زي طريق السويس على سبيل المثال. ثم من جوة بقى الكتلة السكانية اللي موجودة في شرق القاهرة، سواء كانت في مصر الجديدة، أو مدينة نصر، او مسطرد أو الكلام ده، عملنا محاور وكباري تخفف الحركة، بما فيه حتى المنطقة بتاعة البعوث الإسلامية، اللي هو الفردوس، اللي هو هايبقى امتداد محور الميثاق... طب إيه تاني؟ طيب، متشكرين.

...

يعني، ماشي ماشي.. طيب، أنا دلوقتي كنت معدي على المحور بتاع ال، اللي هو شنزو آبي ده، وعديت على مدينة الأمل.. آه بس أنا عديت عليه لسه ما اتسفلتش.

النقطة التانية، هنا في مدينة نصر، في أسواق كتير، دورين، أرضي، بالكتير أرضي، وساعات ألاقي دورين، أرضي وفوق منه. ماتنتقوا عدد من الأسواق اللي هي أرضي مثلا، هم دايما بيكونوا عاملين باركنج قدامها، مش كدة؟ طيب، مانشيل ده، ونعمل دور ولا اتنين جراج تحت الأرض، ونعملهم دورين كمان، بحيث إن إحنا نوسع على الناس.

الحاجة التانية، لو أراضي فاضية، قولولنا عشان نخش نعملها، نعمل أسواق، ونعمل جراجات لهم يعني، مش كدة؟ طيب. الحديقة التانية خلاص ولا لسه؟ متشكرين.. سلامو عليكو.

...

قانون الأحوال الشخصية، إحنا حريصين على إن هو يطلع متوازن، متوازن يعني إيه؟ يعني يوفر توازن بين كل الاعتبارات، بين الأم وبين الأهل. الحوار المجتمعي هانوسعه أكتر من كدة، وإحنا هانبقى حريصين على إن القانون يخرج بشكل يحقق لكل المستفيدين منه... لا يا فندم.. لا يا فندم، لا يا فندم، لا.. كتر خيرك، متشكر، متشكرين، كتر خيرك، متشكر، متشكر، متشكر، كتر خيرك يا فندم.. سلاموا عليكوا.


ألقيت الكلمة في القاهرة، بحضور عدد من المهندسين والمسؤولين عن تنفيذ الأعمال الإنشائية الخاصة بتطوير شبكة الطرق والمحاور بالقاهرة.


خدمة الخطابات الكاملة للسيسي تجدونها في هذا الرابط