الرئيس عبد الفتاح السيسي أثناء تفقد الطرق. الصورة: المتحدث باسم الرئاسة- فيسبوك
نص كلمة السيسي أثناء تفقده لأعمال تطوير الطرق والمحاور بشرق القاهرة 26/2/2021
أنا بعمل كل الحجم ده من الكباري ومن الطرق، ليه؟ الهدف منه إيه؟ تحرير الحركة.. أنا عايز أقولهم إن أنا بحرر الحركة. آدي محور الشهيد أهو، وآدي محور حسن المأمون. أنا بعمل بقى الحركة بتاعة ذاكر حسين بالكامل، بحررها له لغاية فين؟ لغاية الدايري. حررتها له بالطريقة دي، يبقى أنا عملت كام محور موازي بقى؟ يبقى عندي الشهيد، عندي ذاكر حسين، عندي النصر، السكة البيضة سميتوه، ثم صلاح سالم، ثم جسر السويس.
هو ده اللي إحنا عايزين نقوله للناس.. يبقى أنا شرق القاهرة، شرق القاهرة كله كتلة فيها حوالي 4، 5 مليون، إحنا حلينا الإيه؟ الحركة بالنسبة لهم تمامًا. بتتحرك فيها 2، 3 مليون عربية، أنا خليت ال2، 3 مليون العربية دول يتحركوا في لا زمن.
هو ده اللي أنا أحب أسمعه وأقوله لإيه؟ للناس، عشان تبقى فاهمة ليه إحنا بنعمل ده كله؟ الفلوس دي كلها بنصرفها عشان نعمل حركة مُيسرة، تمنع التلوث، تضيع وقت وجهد كتير، وقود كتير، وتخفف على الناس.
المحور بتاع شينزو آبي اللي إحنا قلنا عليه، مهم قوي إنك إنت تقول هنا إن إحنا قلنا هانكمل جوه ال، مدينة الأمل، عشان نفتح لهم محور هم، فوق هايبقى كوبري، وتحت يبقى إيه؟ طريق لهم.. طريق لهم، طريق لهم. ثم بقية الطرق اللي إحنا بنفكر نـ.. إن شاء الله نعملها لهم، عشان نخلي المكان هناك أكثر سهولة في الحركة ليهم، لغاية لما نوصل طريق السويس، مش كده؟
يبقى أنا خليت طريق السويس ده، محور رئيسي جدًا، بيجيب من مدن كبيرة، العبور والشروق والتجمع وغيره، وخليت له روافد على الشهيد، وخليت له روافد على حسن مأمون، وخليتله روافد على شينزو آبي.
إحنا إمتى هانشيل بقى آخر ال.. لأن ده هايأخركوا ييجي شهرين تلاتة موضوع الكهربا ده... طيب، العرض ده قد إيه؟ من المباني، للمباني، من المباني دي، للمباني دي، 300 متر؟ من أول يمين للشمال، اللي جواه ده إيه هاتعملوه، ده موضوع تاني، كام متر؟ 300 متر؟ طيب، يبقى إنت هاتحافظ على ال300 متر عدا الحتة اللي عند مدينة الأمل، مش كده؟ طيب متشكرين.
...
ألقيت الكلمة شرق القاهرة، أثناء قيام سيادة الرئيس بجولة تفقدية لأعمال تطوير الطرق والمحاور.
...
